احلم معانا

لا يا اميرة انا كمان بحلم بقنوات مصرية خالية من الاباحية .بحلم اتفرج علي فيلم من غير ما تتاذي مشاعري من غير ما اضطر اخبي عين ابني . اشوف اعلان نظيف ممتع من غير اسفاف . وكمان بحلم اشوف فيلم زي الايدي الناعمة في قصة حب بس راقية ونظيفة تسمو بالروح لاعلي مش تنزل بالنفس للدونية والانحطاط نفسي اقعد اتفرج علي التليفزيون من غير ما حخس اني بغضب ربنا نفسي اتفرج علي برنامج يقدر يوصلني لنفس المتعة اللي كنت باوصلها وانا بتفرج علي الف ليلة وليلة في الثمانينات .والله يا جماعة الاعلانات بقة بتوصلنا باباحيتها المفرطة لمرحلة القرف والاشمئزاز

بحلم يكون امام كل بيت صندوق كبير تتحط فيه القمامة بحيث كل شقة تنزل فيه كيس قمامتها فى نهاية كل يوم بدل ما يتحط فى الشارع وبكده نوفر على عامل النظافة مجهوده ويادوب يقوم بقلب الصندوق الكبير فى عربة القمامة ويكنس التراب من الشارع

وياريت نفصل بواقى الاكل عن باقى القمامة بوضع بواقى الاكل وتنظيف الخضار فى شنطة لوحدة عشان ممكن لعامل النظافة ان يستفيد به بأن يجعله اكل للطيور مثلا وكمان عشان ميعملش ريحة وحشة فى القمامة

اخيرا حلم تانى من احلامى اتحقق قناة التليفزيون العربى قناة الفن الاصيل وزمن الفن الجميل بجد انا فرحانه بيها قوى اخيرا هنشوف فن هادف ممتع بدون ابتذال ولا اباحية ومسلسلات قصصها جميلة وهادفة مش مسلسلات منقولة كوبى من بعضها او قصص لشخصيات اتعرضت ميت مرة واللى بيدل على الخواء الفكرى والفنى اللى احنا فيه

شابوه لكل اللى ساهم فى خروج القناة دى للنور ويارب تكون فتحت خير

قناة التليفزيون العربى 12766 افقى

الــــــــــــــــــــــــــــــــــــــــــــــــــــــاـــــــــــــــــــــــــــــــــــــــــــــــــــه عليكى اسمعى اغنية محمد فؤاد الجديده ساعات بشتاق وعاوز اعرف رايك فيها ايه احلامك جميله وسهل تحقيقها لانك بسيطه فى شخصيتك وعبقريه فى تفكيرك على فكره بجد انت خساره فى انك متكونيش من الصفوف الاولى بس انت عاوزه يكون عندك قناه من اى نوع بالظبط وفى اى اتجاه يكون هدفها انت عارفه انا اتمنى ان ايام رمضان اللى فاتت وانا صغير ترجع تانى بريحتها وطعم ايامها

انا اول حلم لى ان شاء الله فى طريقه الى ان يتحقق وهو ان ان شاء الله هطلع عمره فى شهر رمضان وباقى الاحلام تاتى تباعا نفسى احج اولا وبعد كده يكون عندى مشروع كبير اقدر اشغل فيه ناس كتير واكون مسؤل عنهم ونفسى ربنا يرزقنى الزوجه الصالحه التى يكون له فيها رضا ولى فيها صلاح واكتر حاجه نفسى فيها ان اموت موحدا وادفن فى البقيع
انا كان لى احلام تانيه وانا صغير شويه بس خلاص صعب انها تتحقق دلوقتى بس من غير ما تضحكى لو سمحت ههههههههههههه كان نفسى ادخل الكلية الحربيه وكل سنه لغاية دلوقتى لما بشوف حفل التخرج عينى بدمع لوحدها مع ان عارف ان كل انسان ميسر لما خلق له والحمدلله على كل حال

بصرة ياعم حلمى اللى اتحقق انى اطلع عمرة وبالفعل ربنا كرمنى وطلعت من 4 سنين بس لسة بحلم اطلع تانى بس فى رمضان ربنا يبعت اما الحج فده مفروغ منه ربنا يكتبهالنا يارب وبخصوص الدفن فى البقيع انا بحلم بيها اقولك دعاء تقولوا ربنا الهمنى بيه بس متقولش لحد

اللهم اقبضنى اليك وانا ساجدة بين يديك فى الروضة الشريفة واجعل البقيع دار مقامى

اما بخصوص الكليه الحربية فدى بصرة تانية لانه كان نفسى ادخل كليه الشرطة ومن غير ضحك اصلى كنت مدمنة سماح انور وانا صغيرة اما الزواج فده رزق ربنا بيبعته وقت مايحب وبما انك لسة متزوجتش يعنى معنس زى حالتنا فياريت تدخل اللينك ده وتشاركنا برأيك

https://azhari.7olm.org/montada-f16/topic-t51-28.htm


انا بحلم يكون عندى شركة مقاولات ابنى عمارات واعمل نوعين نوع للشباب ويكون الايجار المدفوع عبارة عن اقساط وبعد فترة تصبح الشقه ملك الشاب ونوع تانى يكون للناس المقتدرة عشان النوع ده هو اللى يصرف على النوع التانى

واعمل فى كل عمارة شقتين للاسرتين غلابة شقة منهم اديلها محل تفتحه بقالة يخدم على سكان العمارة والشقة التانية اخلى رب الاسرة البواب واهو يسترزق من السكان وبكده اكون وفرتلهم سكن وعمل

ايه رأيكم بقى فى حلمى