مغنى لكل مواطن
الشعار ده سمعته من سنين وكان ساعتها شعار للسخرية لكن للاسف هذه السخرية تحولت الى حقيقة فى عصر الفضائيات المفتوحة والجرى وراء التربح السريع فنجد ان كل من يريد الشهرة وجنى الاموال يذهب الى اقرب ملحن او مايشبهه عشان يلحن له لحن يركب عليه شوية كلام ويعمله فيديو كليب فيه كام واحدة بترقص ولا مانع هو نفسه او هى نفسها يرقصوا مهى بقيت هيصة
المهم ان الاغنية تفرقع والاسم يتعرف وشويه شوية يوصل للافلام ولو ربنا نفخ فى صورته او صورتها يوصلوا للمسلسلات عشان نلاقيهم بلا احم ولا دستور جوه كل بيت
اللى يحرق الدم بقى الفضائيات نفسها وكمية البرامج الغير طبيعية لاختيار المطربين من اول استار اكاديمى وسوبر ستار الى اخره وسمحونى معرفش ايه اخر حاجة لانى مش متابعة معلش جاهلة
الا ملاقيت مسابقة بنت حلال كده لاختيار ممثلين شبان عندهم موهبة التمثيل مش موهبة التعرى ولاحتى مسابقة لكتابة السيناريو بدل ما أحنا عمالين نعيد ونزيد فى نفس القصص لاء ونرجع القديم ونحدثه ونعرضه بصورة جديده وده ان دل فيدل على خواء فكرى وابداعى
طب فهمنا تهافت الشباب والبنات على الغناء مهم مش لقينلهم شغلانه وعايزين يفرقعوا ويصعدوا بسرعة الصاروخ عشان كده بيقدموا اى حاجة اللى انا مش فهماه المسئولين عن البرامج دى هدفهم ايه عايزين ايه بصراحة انا كل اللى شيفاه انهم عايزين يخربوها ويقعدوا على تلها
عموما أهو المواطن على الاقل بقالوا حاجة بقالوا مغنى
مغنى لكل مواطن .....................وعجبى
الرئيسية 
